Միահարված փուլ

Վերարտադրեք Շլացուցիչ Սատանայի փուլային տաղանդը

… Ցանկություններից կուրացածը ֆիլմից՝ այդպիսով սխալ հանելով պրոֆեսիոնալ փուլիստ Թոնի Ռոբլեսին։

Մրցանակ

Ընդհուպ ութ ցանկության իրագործում։ Մրցանակը սկսվում է մեկ ցանկությունից, որին ամեն վաթսունվեց օրը մեկ գումարվում է ևս մեկ ցանկություն մինչ յոթ ցանկության լրանալը։ Մեկ հավելյալ ցանկություն նախատեսված է որպես պարգևավճար լրացուցիչ պահանջին բավարարող լուծման համար։

Ցանկապետ

Ռեբելեոն ՍՊԸ

Պայմաններ

Առաջադրանք

  1. Հավակնորդը պետք է մեկ հարվածով անցքերի մեջ գլորի փուլի սեղանին գտնվող տասնվեց գնդերից տասնչորսը, ընդ որում դա պետք է կրի օրինաչափ, այլ ո՛չ թե պատահական բնույթ․ մրցանակի՝ N ցանկության հասած լինելու պարագայում հավակնորդը նշված արդյունքը պետք է կարողանա ցույց տա N հաջորդական փորձից N֊ում։

  2. Լուծման մեջ օգտագործվող սեղանը, գնդերը և ձողը պետք է լինեն այնպիսին, որ դրանցով հնարավոր լինի սովորական փուլ խաղալ։ Փորձառու փուլ խաղացողը միգուցե փնթփնթա գույքի ցածրորակ լինելուց, բայց չպետք է մատնանշի բացահայտ շեղում ստանդարտ գույքից։

  3. Գնդերի սկզբնական դասավորությունը պետք է բավարարի հետևյալ պահանջներին․

    • Առավելագույնը 4 գունդ կարող է գտնվել մեկ այլ գնդից գնդի տրամագիծը (D) չգերազանցող հեռավորության վրա։

    • Անցքերի մոտակայքում (D֊ն չգերազանցող հեռավորության վրա) պետք է լինի ոչ ավել, քան 2 գունդ։

    • Եզրին մոտ (D֊ն չգերազանցող հեռավորության վրա) պետք է լինի ոչ ավել, քան 4 գունդ։

    • Նույն գծի վրա պետք է գտնվի ոչ ավել, քան 3 գունդ, այն է՝ գնդերի յուրաքանչյուր զույգի համար նրանց կենտրոններով տարված երևակայական ուղիղը կարող է անցնել առավելագույնը մեկ այլ գնդի միջով։

    Այս սահմանափակումները միտված են բացառելու սրանց պես “հեշտ” լուծումները։

  4. Տեղադրված գնդերը հարվածից առաջ պետք է անշարժ լինեն։ Սեղանը պետք է միշտ անշարժ լինի (այսպիսով բացառվում է գնդերի՝ անցքերում հայտնվելը, օրինակ, հարվածի հետ համընկնող երկրաշարժի արդյունքում)։ Հարվածից հետո գնդերի՝ անզեն աչքով դիտարկելի վարքը պետք է տեղավորվի միջին փուլ խաղացողի փորձի հիման վրա ձևավորված ինտուիտիվ օրինաչափությունների մեջ։ Պարզագույն օրինակ՝ գունդը չի կարող սկսել գլորվել, քանի դեռ նրան չի բախվել մեկ այլ գունդ։ Բացահայտ կորագիծ հետագիծը թուլյատրված է առավելագույնը մեկ գնդի համար։

  5. Հարվածի նախապատրաստության տևողությունը (ներառյալ գնդերը դասավորելը) պետք է չգերազանցի 666 վայրկյանը։ Հարվածից հետո գնդերի շարժը պետք ավարտվի առավելագույնը 1/666 ժամվա ընթացքում։

Մրցանակի հայտ ներկայացնելը

  1. Լուծումը ցուցադրող չմոնտաժված տեսանյութի հղումը պետք է հրապարակել մրցույթի քննարկման էջում, որից հետո նույն լուծումը պետք է կրկնել Fumpetition.org֊ի ներկայացուցչի ներկայությամբ Երևանում։

Պարգևացանկություն

  1. Մրցանակին գումարվում է հավելյալ ցանկություն, եթե լուծումն աշխատում է վերը շարադրված պահանջներին բավարարող, սակայն Fumpetition.org֊ի ներկայացուցչի կողմից առաջարկվող կամայական դասավորության համար։

  2. Պարգևավճարին հավակնող մասնակցին տրվում է N փորձի հնարավորություն, որտեղ N֊ը ընթացիկ մրցանակում ներառված ցանկությունների քանակն է։ Պարգևացանկությունը տրամադրվում է այդ փորձերից առնվազն կեսի հաջողությամբ պսակվելու դեպքում։ Եթե բոլոր փորձերը տապալվում են, ապա մասնակիցը չի վաստակում պարգևացանկությունը, ինչպես նաև զրկվում է մրցանակային ցանկություններից մեկից (որպես տուգանք՝ պարգևացանկության չհիմնավորված հայտ ներկայացնելու համար)։

  3. Գնդերի դասավորված լինելուց հետո հարվածը պետք է իրականացվի նախքան 666֊րդ վայրկյանի լրանալը։

Ցանկություններ

  1. Ցանկությունների իրագործման հայտերը (ցանկահայտերը) պետք է ներկայացվեն հաջորդաբար մրցույթի քննարկման էջում հրապարակային գրառման միջոցով։

  2. Ցանկությունները փոխանցելի չեն։

  3. Յուրաքանչյուր ցանկահայտ պետք է ներկայացվի ոչ ուշ, քան նախորդ ցանկության իրագործումից (կամ, առաջին ցանկության դեպքում, դրա իրավունքը ստանալուց) 666,666 վայրկյան անց։ Հակառակ դեպքում ցանկությունը կորչում է։

  4. Ցանկահայտի հրապարակումից հետո այն փոփոխման ենթակա չէ։ Սակայն ցանկապետը կարող է ներկայացնել ցանկահայտը ճշգրտելու առաջարկներ, որոնք ենթակա են ցանկատիրոջ կողմից հաստատման կամ մերժման։

  5. Մրցույթի ցանկապետը ցանկահայտի վերջին հաստատված տարբերակը պետք է կատարի 666 ժամվա ընթացքում՝ սկզբնական ցանկահայտի հրապարակման պահից հաշված։ Ցանկապետը հրապարակայնորեն կհայտարարի ցանկության իրագործման մասին, իսկ ցանկատերը կարող է այդ պնդումը հաստատել կամ բողոքարկել։ Ցանկությունը համարվում է կատարված, երբ ցանկատերը հավաստում է այդ փաստը, կամ ցանկահայտի իրագործման հայտարարման պահից հետո 6,666 րոպեն անցնելուն պես՝ բողոքարկման բացակայության պարագայում։

  6. Կամայական ցանկահայտ կարող է մերժվել առանց որևէ պատճառաբանության, որի դեպքում ցանկապետը պարտավոր է 66,666֏ չափով փրկագին վճարել (ամեն այդպիսի ցանկահայտի դիմաց) մինչև ցանկահայտի իրագործման վերջնաժամկետի լրանալը։ Փրկագինը վճարվելու է ՀՀ դրամով բանկային փոխանցման միջոցով՝ նվազեցված կիրառելի հարկերի չափով։ Նմանապես, նույն չափի փրկագին պետք է վճարվի ժամանակին չկատարված ցանկությունների փոխարեն․ այս դեպքում փրկագինը պետք է վճարվի ոչ ուշ, քան ցանկահայտն իրագործելը ձախողելու փաստի արձանագրվելուց 666,666 վայրկյան անց։ Եթե փրկագինը ժամանակին վճարելն անհնարին է դառնում ցանկատիրոջ բանկային հաշվեհամարի տրամադրված չլինելու պատճառով, ցանկապետն այդ գումարը կփոխանցի իր հայեցողությամբ ընտրված բարեգործական կազմակերպությանը, և այդպիսով այդ ցանկության էջը կհամարվի փակված։

Մտավոր սեփականություն

  1. Մասնակիցները, հաղթողը ներառյալ, պահպանում են բոլոր իրավունքները մրցույթին մասնակցելիս ստեղծված՝ մտավոր սեփականության իրավունքով պաշտպանվող բոլոր արդյունքների (այդ թվում՝ գյուտերի, նորարարությունների, տեսանյութերի) նկատմամբ։

Հավելյալ հորդոր

  1. Կոչ եմ անում մասնակիցներին իրենց իսկ սոցիալական էջերում կամ մրցույթի քննարկման էջում կիսվել սույն առաջադրանքի լուծման զանազան (այդ թվում՝ ամենախելահեղ) տեսականորեն հնարավոր տարբերակների գաղափարներով։

  2. Ցանկալի է, որպեսզի մասնակիցները փաստագրեն (տեսանկարահանման և/կամ գրավոր ձևով) և առցանց հրապարակեն լուծման վրա իրենց աշխատանքի ընթացքը ևս։